L património cultural de l Nordeste Stramuntano, custitui un eilemiento mui amportante de la sue eidentidade i al mesmo tiempo ua rezon de zambolbimiento. Miranda ye ua region raiana cun Castielha i Lhion (León, Aliste, Senábria), regiones que quemúngan dua cultura mui armana ne l que ten a ber cula música / eitnografie – la cultura feliçmente nun ten raias. La lhéngua própia, l Mirandés, la música i ls sous strumientos, las manifestaçones festibas, la gastronomie, toda la bibença ne l campo, i muitas outras rezones, dan-le a Miranda i al Nordeste Stramuntano an giral, ua cultura i eidentidade que merece ser acarinada, guardada i bibida.
Galandum Galandaina ye cumpuosto por quatro pessonas: Paulo Preto, Paulo Meirinhos, Alexandre Meirinhos i Manuel Meirinhos. Dedícan parte de la sue bida a arrecolher, studar i dibulgar nas mais defrentes formas la música tradecional de la pequeinha region de l Nordeste Stramuntano. Fázen por le dar un aire de modernidade als sous trabalhos, nun çcuidando ls ritmos i timbres tradecionales de ls strumientos i bozes. Fázen l mais de ls sous strumientos, modefícan i strefórman outros que úsan. Deste modo cunsíguen sonoridades i afinaçones que le dan un stilo mui própio.
Galandum Galundaina no Myspace: myspace.com/galandumgalundaina